Una tardi, estaban tres mocitas en una casa diciendu:

- Yo me casu con el panaderu.

- Yo me casu con el cocineru.

Y la más chiquita diju:

- Yo me casu con el rey.

Pasó el rey a desotra tardi por allí y le diju:

- Pus ayer tardi andabais diciendu ahí que vos ibais a casar con el rey, con el panaderu y con el cocineru.

Y diju la chica:

- Sí, sí, yu dije que me casaba con el rey.

Y se casaron y al año pus tuvun un niño. Y jué y le dijon las hermanas que esu nu se podía ver, y qu'era un bichu y se lo tiraron; a la mujer del rey le tiraron el niño.

Al sotru año tuvo otru niño, y también se lo tiraron p'allí, pa un jardineru. Lo recogió el jardineru, comu al otru, al primeru.

Al sotru año, pus tuvun una niña y tós le decían al rey:

- ¡Oy! Esu no se puede ver, qu'es un bichu. Y la triraron pal jardineru.

Y cogió el rey y echó a su mujer, ya nu la quisu, qu'aquella mujer ya no la quería, que na más le paría que bichus.

Dispués ya jué y los niños los arrecogió el jardineru: dos niños y una niña. Y se hizun mozus. Y se murió el jardineru y la jardinera y quedaron los tres solitus. Y una tardi pasó por allí una viejita y le dici:

- Aquí na más vos hacen falta que tres cositas: el pajaritu que habla, el agua de osu y el arbolitu que canta.

Un hermanitu suyu se jué a bucarlus y no golvió. Dispués el otru hermanitu diju:

- Yo me voy detrás de mi hermanu a vel si lo encuentru.

Y la hermanita después que se jalló allí solita, sin los sus hermanus, pus cogió el caminu y se jué por ondi jueron los sus hermanitus. Cuando, onde, ya le dijun:

- Ni anque te llamen ladrona, ni anque te llamen lo que te llamen, no te güelvas p'atrás que t'encantas pállí, comu los tus hermanus.

Y ella alantri, hasta que llegó al arbolitu y cogió el pajaritu. Y el pajaritu le diju:

- Coge una botella de ese agua de osu.

Y el arbolitu que canta le diju:

- Ahora, en esas losas d'ahí, en esas lanchas de pizarra negra, le echas unas goteritas de agua.

¡Y salierun sus hermanitus tan guapus! Y dispués le echó más goteras por allí y salieron muchas mozas y muchos mozus. Y ya se vinum p'acá, con aquellas tres cositas que trujun.

Una tardi, pus salieron de caza los dos hermanus. Y el rey, pus también anduvo de caza con ellos. Y al rey le hacía mucha gracia aquellos mocitus cazadores. Y los envitó una tardi que juesin a merendar a su cas. Y le dijon:

- Si, señor, pero tenemos que preguntárselu a mi hermana.

Y le diju su hermana.

- Sí, pero lo heis de invitar, que venga él aquí otra tarde a merendar.

Cuando vinu el rey, entró por aquel jardín que tenían. Pus empezaron a cantar el arbolitu, todas las hojas a la par, y el agua de osu, y el pajaritu que habla. Cuando se pusun a comer el pajaritu a la moza:

- Usté le ponga cosa de comel que nu haya visto el rey.

Cuando se pusun a comel, el pajaritu se sentó allí en la mesa con él y le diju:

- Estos tres hijus son de usté. Cuando dio la su mujer a luz, se los iban tirandu, p'allí, pa un jardinero. Y las sus hermanas decían que nu más paría que bichus. Y los arrecogieron aquí. Yestos hijus todos son del señor rey.

Dispués cogió unos pocus de soldaos, y jue a coger a su mujer, que la tenía en una casa p'allí. Jué a buscal la su mujerita y quedó tan contentu con los sus hijus. Dispués mandó matar a las sus cuñás, las hermanas que le hizon esu de los niños, que ya sabe usté. Y ahora ya s'acabó.

Informante: María Antonia Pascual Sánchez. Vecina de Peñaparda